Home » Diinta, Wararka » Wafdigii culumada ahaa oo booqday degmada Xarfo iyo deegaanka Bacaadweyn (Sawiro)

Wafdigii culumada ahaa oo booqday degmada Xarfo iyo deegaanka Bacaadweyn (Sawiro)

Waxaa soo gaaray magaalada xarfo wafdigii culumada ahaa ee  uu hogaaminayey Sh. Axmed C/samad 24-01-13, halkaana waxaaa ku soo dhaweeyey gudoomiyaha degmada C/laahi Faarax Bayle, Sh. C/qaadir Cumar Awdheere iyo Sh. Axmed Maxamed Guuleed. Ka dib culumadu waxay booqdeen dugsiga Daarul Qur’ aan oo ay dhigtaan 370 arday, waxaana ardayda kalimad wacdi iyo dhiirrigalin ah u soo jeediyey Sheekh Xabiib C/qaadir.

Culumadu waxay xarunta degmada kulan kula qaateen maamulka degmada oo ay hormuud u ahaayeen duqa magaalada C/laahi Faarax Bayle, kuxigeenkiisa Cabdi Cilmi Calas iyo xoghayaha dowladda hoose C/salaam Siciid Ciise, waxayna ka dhagaysteen duqa iyo ku xigeenkiisa warbixin ku saabsan horumarka iyo waxqabadka degmada, waxyaabaha ay hiigsanayaan iyo caqabadaha hortaagan oo ay u baahanyihiin in wax lagala qabto.

Ka dib culumadu waxay maamulka degmada u soo jeediyeen talooyin ay ka mid ahaayeen: inay dareemaan xilka weyn ee ka saaran dacwada iyo barashada diinta, ka shaqaynta danaha bulshada gaar ahaan xoojinta waxbarashada, waxayna ku boorriyeen inay iyagu maamul ahaan noqdaan kuwo isku kalsoon, iskuna duuban, dadkoodana walaaleeya, kana fogeeya qabyaaladda iyo kala qoqobka. Taas oo ah waddada lagu gaarayo horumar adduun iyo badbaado aakhiro.

Culumada oo ay weheliyaan ducaadda magaalada waxay booqdeen xarunta waxbarashada gabdhaha, waxayna kalimado isugu jira waano, wacyigalin iyo dhiirrigalin u soo jeediyeen ardayda dugsiyada sare iyo dhexe ee xarunta wax ka barta, ka dibna waxay dumarka muxaadaro ugu jeediyeen xarunta Daarul Qur’aanka, waxayna kala hadleen waxbarashada diimeed, dacwada iyo isu kaashigeeda, walaalnimada islaamka iyo ka dheeraanshaha qabyaaladda iwm oo muslimiinta kala geynaya.

Dabadeed culumadu waxay la kulmeen ducaadda iyo odayaasha dacwada degmada Xarfo, kulankaas oo ay ka soo qaybgaleen Sh. C/qaadir Cumar Awdheere, Sh. Axmed Maxamed Guuleed, Nabadoon Xasan Macalin Daahir, Macalin C/rashiid Sh. Maxamuud iyo Macalin C/nuur Jaamac Xirsi, waxayna labada dhinac is dhaafsadeen warbixino iyo talooyin wax ku ool ah, culumaduna waxay aad ugu dhiirrigaliyeen ducaadda magaalada sabarka iyo dareenka xilka weyn ee ay ummadda u hayaan, waxayna ugu bishaareeyeen inay guulaysan doonaan inta ay dadaalkaas wadaan iyaga oo isku duuban, Ilaahayna kaashanaya.

Culumada intii ay magaalada joogeen waxay soo booqdeen dhismaha dugsiga sare oo jaaliyadda deegaanka xarfo ay dhismihiisa maalgaliyeen, meel fiicana maraya.

Sheekh C/qaadir ayaa culumada quraac sharaf gurigiisa ugu sameeyey, ka dibna wuu sii sagootiyey, wuxuuna kala qaybgalay booqashadii ay ku tageen magaalada Bacaadweyn oo uu Sh. C/qaadir horay uga soo furay Daarul Qur’aan.

 

Booqashadii Bacaadweyne

Wafdigii culumada ahaa ee uu hoggaaminayey Sh. Axmed C/samad oo uu weheliyo Sh. C/qaadir Cumar Aw dheere ayaa 24/01/13 soo gaaray magaalada Bacaadweyn, waxayna ka jeediyeen masaajida magaalada Kalimado ka hadlaya cabsida Ilaahay, masuuliyada dacwada, islaaxinta bulshada iyo faafinta cilmiga. Ka dib waxay shir la qaateen culumada, macalimiinta iyo qaar ka mida odayaasha dacwada, waxayna ka wada hadleen sidii loo dardargalin lahaa dacwada deegaanka Bacaadweyn iyo gaar ahaan sidii magaalada looga hirgalin lahaa mac-had lagu barto culuumta shareecada iyo luqada carabiga.

Magaalada Bacaadweyn oo sanadahaan dambe aad u kobocday ayna ka jiraan xarumo waxbarasho oo farabadan, sida: dugsiyo Qur’aan, dugsiyo H/dhexe iyo dugsi sare. Waxaa kale oo dhawaan laga hirgaliyey Daarul Qur’aan lagu diirsaday ayaa la isla gartay inay baahi weyn u qabto hirgalinta mac-had diini ah oo ay ka wada faa’iidaystaan ardayda iskoolada iyo dadweynaha magaaladu, waxaana lagu balamay in arrintaas laga yeesho shir ballaaran oo ay ka soo qaybgalaan ducaadda magaalada, maamulka dacwada gobolka Mudug, maamulka iyo waxgaradka magaalada.

Intaa ka dib wafdiga culumadu wuxuu fadhi gaaban la qaatay duqa magaalada iyo ku xigeenkiisa iyo xubno kale oo ka tirsan maamulka deegaanka, waxayna isla meeldhigeen in kulan dambe oo intaan ka ballaaran la isugu yimaado, loogana hadlo sidii loo hirgalin lahaa mashaariicda culumadu soo jeediyeen.

Wafdiga culumada oo ay xubno ka ahaayeen Sh. C/waduud Yuusuf, Sh. Mukhtaar Sh. Maxamuud, Sh. Xabiib C/qaadir iyo Sh. Axmed C/samad waxay u ambabexeen dhinaca magaalada Gaalkacyo oo Bacaadweyn 40km ka xigta dhinaca koonfureed, waxaana halkaa ku sii sagootiyey Sh. C/qaadir Cumar oo kala qaybgalay hawlihii ay ka fuliyeen magaalada.

Leave a Reply

© 2008-2014 somalireal.com · RSS · Designed by Zakaria
oyun oyna porno